СУПЕРМОРТ???

  Блогӧй нитшсяліс нин... Збыль вылас кӧ, ме быд вежон кӧсъя мыйкӧ гижыштны татчӧ. Но вежонсӧ вежӧ мӧд, коймӧд и...сідзи водзӧ... Кывтӧ-визувтӧ олӧмыс. «Ӧуввезса войтыр» ногӧн кӧ, мукӧддырйиыс пӧ ми мӧвпнымӧс вӧчам быдса олӧм чӧжся кӧсйӧмӧн, кӧть эськӧ збыльмӧдны сійӧс позьӧ ӧти вежонӧн. Унаторйын и ме татшӧм жӧ...

   Вот висьталӧй, сдайтлінныд-ӧ Ті коркӧ вир? Ме чайта, мый унаӧн вочавидзасны - «эг», кодкӧ - «да, некымынысь», и сӧмын ӧткымынӧн менам тӧдсаясысь вӧчӧны тайӧ сэтшӧм тшӧкыда, кыдзи позьӧ урчитӧм индӧдъяс да дзоньвидзалун серти.

   Медводдзаысь ме вӧлі донорӧн..., кыдзи эськӧ шуис менам велӧдысь Раиса Ивановна Вагнер, "важ том дырйи". Тайӧ вӧлі студенталігӧн на 2011-ӧд вося гожӧмын! Сэк ме вӧлі Тверскӧй обласьтын "Селигер" том йӧзлӧн лагерын. Вир босьтан станцияыс воліс вӧрӧдзыс, кӧні ми олім! Ветлім Таня ёртӧйкӧд. Миянлысь босьтісны 450 мл. Менам дзоньвидзалун вылын тайӧ некыдз эз тӧдчы. А мый вӧлі сьӧлӧмам, ме ӧнӧдз на помнита! Сэк ме кылі ачымӧс (кора прӧшша англо-коми кывъясысь, но окота шуны тадзи) супермортӧн, Donor Sapіens-ӧн, кыдзи вӧлі гижӧма миян футболкаяс вылын. Да, ме некодӧс эг петкӧд биысь, некодӧс эг тупкы пельпомнам пуляысь (Ен мед видзас), но ме отсалі кодлыкӧ бӧр сувтны кок вылас да овны! Шуӧны тай асьтӧ пыдди пуктӧм йылысь. Меным кажитчӧ, мый татшӧм здукъясас, кор тэ юксян дзоньвидзалуннад, тайӧ медвынаа петкӧдчӧ...

  Сыктывкарын ме ветлі жӧ во 4 кымын сайын вир босьтан республикаса станцияӧ. Но сэк ме вирӧс эг сдайт, сы вӧсна мый, вӧлӧмкӧ, лёка дасьтыси лоӧмтор кежлас: сёйи рытнас госатор. Сэк жӧ шуисны, мый абу кӧ менам карса прописка, станцияӧ локтӧдз колӧ босьны удж вылысь справка, кӧні гижӧма, дыр-ӧ ме нин тані зіля.

  Справкатӧ босьті, но эг и ветлы сэсся. Пыр кутшӧмкӧ помка сюрӧ...

  "Приступ патриотизма" (тадзи шуӧ менам Женя нывъёртӧй) овлӧ сэк, кор кытыськӧ лыддян ли кывлан, мый ёна колӧ вир. А нӧшта на ёсьджыка тайӧ петкӧдчӧ, кор неминуча суӧ тӧдсаясӧс. Танюк Кирпиченко висьталӧ, кутшӧма сійӧ олӧ да бурдӧдчӧ онкошӧринын аслас дневникын. Доноръяслӧн войтыркостса лунӧ Таня аттьӧавліс ВК аслас лист бокын найӧс, кодъяс сетӧны вирсӧ мукӧдъяслы и сылы тшӧтш. Коді оз на тӧд, Танялӧн вирын рак... Ыджыд сьӧлӧма йӧз ӧні отсаьӧны сылы бур кывъясӧн, уджӧн, сьӧмӧн. Нывлы вермас ковмыны оз ӧти миллион шайт лы вем вуджӧдан операция вылӧ...

  Став тайӧ лоӧмторйыс ышӧдіс менӧ корны удж вылысь выль справка, колананогӧн дасьтысьны доноралӧм кежлӧ, выльлунӧ чеччыны 6 асылын да медводдзаӧн локны вир босьтан республикаса станциялӧн ӧдзӧс дорӧ. (Медводз пасъя, кӧсъянныд кӧ юксьыны вирӧн, станцияас мунтӧдз сутки эн сёйӧй госа, переча, тшынӧдӧм, жаритӧмторъяс, йӧв, кольк, вый, шоколад, финикъяс да бананъяс. Позьӧ да и колӧ сёйны варенньӧа тшай, сок, морс, компот, минеральнӧй ва, сукар да сушки, пуӧм шыдӧсъяс, ва вылын выйтӧг вӧчӧм макарон, градвыв пуктасъяс да фруктъяс. Сдайтан лунас нин асывсяньыс юӧй сакара тшай!)

   Вир босьтан станцияын медводз ме вылысь пӧрччӧдісны кӧмӧс да сетісны сланцы. Мӧд судтаын регистратураын ме петкӧдлі паспорт да справкаӧс, тырті анкета. Сэні жӧ шуисны, мый менсьым босьтасны плазма (сійӧ колӧ сотчӧм да доймалӧм йӧзлы пыртӧм вылӧ). Сэсся пыри врач дорӧ. Сійӧ мерайтіс давленньӧ, кывзіс морӧс пытшкӧсӧс, арталіс сьӧктаӧс и... Юалӧ: "Тӧданныд джуджданыдтӧ?" Мися, 176 см. А сійӧ: "Ме чайта, мый Ті ыджыдджыкӧсь!" Сувті мерайтчыны и... 178 да неуна! Вот ме и шензи! Ме чайті, мый важӧн нин ог быдмы! Сэсся мӧд кабинетын нин босьтісны чуньсьым вир, минут 5 мысти  сетісны анализ кывкӧртӧдъяс, шуисны вир группаӧс (ме ичӧтдырсянь тӧда, мый сійӧ менам медся гежӧд, и таысь мыйлакӧ любӧ =)) да ыстісны водзӧ. Коймӧд судтаын меным сетісны кутшӧмкӧ набор (кабалаяса да шприцъяса), бахилъяс да дӧратор, кодӧс сэсся колӧ вольсавны ас вылад. Вир босьтан жыръяс уна небыд кушетка-креслӧ. Гашкӧ, 10 кымын, эг артав. Медводз вӧлім кыкӧн: мужичӧй да ме. Сылысь ӧдйӧ босьтісны вир, сетісны справка да мӧдӧдісны бӧр. Менӧ видзисны 3 пӧв дырджык. Медводз менсьым босьтісны 450 мл вир, сэсся вир босьтан трубка местаас пуктісны капельница. Та костті вирӧс кытчӧкӧ нуисны, мед перйыны сэтысь плазмасӧ. Сэсся вайисны кокняммыштӧм нин мешӧк да бӧр пыртӧдісны меным плазматӧм вирӧс. Процедура чӧжыс ме видзӧді телевизор. Колӧ пасйыны, мый менӧ ӧтарӧ юасисны, ставыс-ӧ бур, оз-ӧ бергав юрӧй. Тӧждысьысь врачьяслы содтӧд майшасьӧмъяс ме эг вай =). Ставыс колис бура!

  Сэсся регистратураын меным сетісны уджысь 2 шойччан лун коран справка, "Спасибо, донор" гижӧда ручка, кассаын - бура сёйӧм, крепаммӧм да вын содтӧм вылӧ 622 шайт 60 ур.

  Но тайӧ, дерт, абу медшӧрыс. Медшӧрыс — кодлыкӧ отсалӧм, тӧдтӧм мортлы, тӧдсалы, гашкӧ... И, дерт жӧ, сьӧлӧмкылӧмъяс! Ме бара кылі ачымӧс супермортӧн... Татшӧмсяма сьӧлӧмкылӧмъясыс овлывлісны сьӧкыд зачёт-экзамен сдайтӧм бӧрын. Но абу жӧ дзик сэтшӧмӧсь. Верманныд кӧ, вот видлӧй асьныд. ))

  Но суперморталан руыс кутчысьӧ сӧмын ӧти лун. И тайӧ бур... Тайӧ - помка думыштны, мый нӧшта вӧчны, медым сійӧ руыс чужис бара, вӧлі тшӧкыдджыка либӧ оліс тэкӧд... 

Р.S.: Мӧвпала ӧні, кытысь тайӧ "суперморт" кывйыс меным... Воис жӧ тай юрӧ! "Шоныд рыт" благотворительнӧй концерт кежлӧ дасьтысигӧн "АРТ"-ысь Татьяна Логинова гижис миянлы: "Мишкаяс-супер йоз! Абу яндзим том йозсьыс!!!!!!" =)
  Но тайӧ нин дзик мӧд сёрни...