четверг, 17 сентября 2015 г.

СТАВЫС ӦНЬӦ ЛАВЛӦН КИАС!

      Эг и казяв, кыдзи талун чужис со татшӧм авантюра... 
    Письмӧаси ӧти морткӧд. Талун кежлӧ коми блог сылӧн абу на. Нимсӧ ог висьтав. Инкогнито. Шуис, кӧсъя пӧ шоппингасьны. Мися, вай да блогӧ та йылысь гиж, сӧмын юртӧм морта фото эн пукты (Ӧньӧ Лав пыртӧма шоппингасьӧм йылысь аслас гижӧдӧ буретш татшӧм серпас), а содты сэтчӧ асьтӧ выль паськӧмнад. Виччысьтӧг сійӧ меным вочавидзис: "Сӧмын Ӧньӧ Лав бӧрын!" Мися, збыль? Ме ӧд гижа та йылысь сылы. Сійӧ чегъясьыштіс да шуӧ: "Збыль. Лоас блог! Сідзкӧ, виччысям Ӧньӧ Лавсянь ход". Но медым пӧ сійӧ фото вылас быть вӧлі стильнӧй да моднӧй выль дӧрӧм-гачнас да тасманас. Вот тадзи... Тайӧ гуся мортыс кӧсйысис гижасьны мукӧд канмуясті ветлалӧм да быд пӧлӧс виччысьтӧмторъяс йылысь. Чайта, лоӧ зэв класснӧй блог!

   Гашкӧ, ті шуанныд миянӧс инкогнитокӧд шпана чукӧрӧн, кулиганъясӧн либӧ ышмалысьясӧн, но... ме збыльысь ёна кӧсъя, медым тайӧ выль блогыс чужис! Миян пыдди пуктана да радейтана Ӧньӧ Лав, чайта, тшӧтш...

среда, 9 сентября 2015 г.

МОДА... НЕБӦГ КАМОДЫСЬ...

  Кодкӧ велалӧма асывнас вӧчны зарадка, кодкӧ ӧтарӧ шпуткӧ, а кодкӧ, менам мамук моз, быд прӧст здукӧ кысьӧ. Уна-ӧ кад колӧ мортыслы, медым мыйӧкӧ велавны? Туялысьслӧн та серти уна мӧвп. Кодлыкӧ пӧ тырмӧ 18 лун, кодлыкӧ - 254. Унатор петӧ буретш серӧс-привычкасьыс.
  Лун кык сайын ме гӧгӧрвои, мый ме дорӧ кӧвъясьӧма выль серӧс. И, кӧсъя шуны, мый зэв на и бур!
  Гашкӧ, кодкӧ кывзыліс ачпас (селфи) йылысь "Ёрта сёрни" уджтасӧс. Тайӧ вӧлі моз тӧлысь заводитчигӧн. Петассӧ дасьтігас, ме дорӧ воліс... муза! Аддзи колана геройясӧс, ставыс кутіс артмыны, кыдзи кӧсъя - сэтшӧм долыд лоис. И юрӧ воисны кывъяс "Во всём мне хочется дойти до самой сути"... Корси Борис Пастернаклысь кывбурсӧ, печатайті. Листсӧ аддзис шань мойдса нывка, миян звукар Надюк. Мый пӧ лэдзин? Мися, бур кывбур, колӧ эськӧ велӧдны татшӧмъяссӧ да, школасянь юрын этшатор нин колис. Пуктылі, мися, мог во куим сайын гожӧмнас быд вежон велӧдны ӧти кывбурӧн. Кык-куим недель бӧрын дышми. Гашкӧ, гажтӧм ӧтнам вӧлі да сійӧн ли... Шуа Надюлы, а вай ӧтлаын быд вежон велӧдны кутшӧмкӧ кывбур, а пекничаӧ висьтавны ӧта-мӧдлы да уджъёртъяслы! А вай пӧ! Мукӧд радисточкаыс эз пырӧдчыны миян уджтасӧ, дышӧдчыштӧны буди а. ;) 
  Тадзи, Пастернаклӧн кывбур кындзи ми нин бура тӧдам Андрей Дементьевлысь "Никогда ни о чём не желейте", Роберт Рождественскӧйлысь "Если вы есть - будьте первыми" да "Человеку надо мало". 4 вежон - 4 кывбур. Надюк ӧні отпускалӧ, но менам нин сэтшӧма велавсьӧма велӧдны гижӧдъяс, мый ог нин вермы татӧг. Ӧні со кужа нин висьтавны Вероника Тушновалысь "Мне говорят: нету такой любви". А... планысь ӧтдор на неважӧн велӧді Николай Асеевлысь "Я не могу без тебя жить" кывбур. 
  Кывъясыс ӧдйӧ овмӧдчӧны юрын, торйӧн кӧ нин олан ичӧт жырйын да бура аддзан колодильник вылӧ ляскӧм листъяссӧ. ;)



  И сэтшӧм лӧсьыд! Ӧти-кӧ, сӧвмӧ вежӧрыд; мӧд-кӧ, бурмӧдан йӧз водзын сёрнитны кужӧмтӧ; коймӧд-кӧ, юрад пыр нин эм кутшӧмкӧ шедевр, кодӧс позьӧ висьтавны гажъяс дырйи сока стӧканъясӧн тотшкӧдчытӧдз; нёльӧд-кӧ, кодкӧ  тэсянь тӧдмалас тайӧ поэт либӧ гижӧд йывсьыс. Шуам, ме бӧрын мамукӧй велӧдіс "Никогда ни о чём не жалейте" да висьталӧ нин Сёльыбын матыссаяслы да рӧдвужлы. ))
  Ӧнӧдз на Надюккӧд велӧдім ӧткодь кывбуръяс. Позьӧ эськӧ торъяланаӧс, но сылы пыр на кажитчылісны меӧн бӧрйӧмаясыс. Уджъёртӧй эз на лок, кӧсъя та кадӧн велӧдны коми кывбур. Кутшӧмӧс вӧзъянныд? Кӧсъя, мед эськӧ вӧлі кыпыд, сьӧлӧм шонтысь, кодӧс эськӧ позис сины бур йӧзлы.

P.S.: Сэсся лоӧ отчёт!

Водзвыв аттьӧ!

суббота, 29 августа 2015 г.

МЕНАМ ДЯДЬ - ФИЛИПП КИРКОРОВ

  Менам дона Витя дядьӧй 10 во нин абу тайӧ му вылас. Ёна томӧн орӧдісны сылысь олӧмсӧ... Ёна гажтӧмтча сыысь. Во вит сайын коркӧ вӧталі сійӧс да пӧттӧдз сывъялі - сэтшӧма гажӧй бырӧма... 
  Витя дядьӧс казьтыла тшӧкыда, быть нин казьтыла, кор телевизорті сьылӧ Филипп Киркоров. Мыйла? Ичӧтдырйи ме чайті, мый тайӧ сьылӧ менам Витя дядьӧй. Мамӧ шуӧ, кыдзи пӧ аддзан Киркоровӧс телевизорті, шыбитан чачаястӧ, вунӧдлан ворсӧм йывсьыд да котӧртан экран дорӧ "О! Дядя Витяӧй сьыӧлӧ! Дядя Витяӧй сьылӧ!" горзӧмӧн.


  Ог тӧд, кутшӧм ӧткодьлун ме, кага, казялі медводз, но ме бӧрын ставлы кутіс кажитчыны, мый найӧ ӧта-мӧд вылас ветлӧны. А мый? Кыкнанныс ыджыдӧсь, мичаӧсь, видзӧдласыс мыйӧнкӧ ӧткодь, и, меным чайтсьӧ, весиг гӧлӧсныс похож.
  Да... Мирас олӧ 7 гӧгӧр миллиард морт. Быдӧнлӧн чужӧмыс вӧчӧма ӧти ногӧн, а ставӧн торъялӧны... А кутшӧм мичаӧсь йӧзыс! Шензян... Торъялам, но тшӧкыда асьнымӧс либӧ кодӧскӧ ӧткоддялам мукӧд йӧзкӧд. Тшӧкыдджыка - рӧдвужкӧд, но овлӧ, мый синмӧ шыбитчӧ кутшӧмкӧ тӧдтӧм йӧзкӧд либӧ весиг артисткӧд ӧткодьлун. Видзӧдлыны кӧ та боксянь, менам семьяын ставныс кодзувъяс! )) Витя дядь йылысь висьталі нин.
  А вот мамӧлы коркӧ шуӧмӧсь, мый сійӧ ветлӧ Людмила Зыкиналань:



  Гашкӧ. Эм ӧткодьлун. Но, меным кажитчӧ, мый тайӧ аньыслӧн эм ӧткодьлун и менам Анэй бабӧкӧд. Видзӧдлӧй:


  Ӧтчыд Сёльыбын ӧтпускалігӧн рытнас видзӧдім "1 канал". "Сегодня вечером" уджтас, чайта, петкӧдлісны. Триньӧбтіс телепон. Босьті трубка. Вӧлӧмкӧ, Разыбысь Маиса тьӧт звӧнитӧ. Юалі, кыдзи олӧны, а сійӧ: "Рытывбыд тэнӧ телевизорті видзӧдам!" Ме чуйми... Кыдзи... Мися, кутшӧм канал? Маис тьӧт шуис, мый первой, ме нӧшта на шайпаймуні. Вӧлӧмкӧ, ме - тайӧ "Голос" уджтасын вермысь том ныв Дина Гарипова. :)

  А нӧшта ме коркӧ аддзи ачымӧс 1950-1960 вося открытка вылысь. 


А тайӧ гожӧмнас Краснодар крайын Шепсиса пляж вылысь ме аддзылі ассьым Королеваӧс, кӧть эськӧ сійӧ тайӧ кадас зілис Сыктывкарын. 

 И татшӧм видлӧгыс уна на. Быдӧн аслыспӧлӧс, аслас мича да енбиа, но векжӧ зэв интереснӧ аддзывны тэ вылӧ неуна ветлысь мортӧс либӧ тӧдмасьны сыкӧд, кодкӧд чужин ӧти лунӧ, либӧ кодлӧн нимыс тэ кодь жӧ... Хм... ))





суббота, 4 июля 2015 г.

ЗIЛЬӦЙ ЛОНЫ МЕДБУРЪЯСӦН!

  Пӧддельнӧйса школаын велӧдысь Вера Михайловналӧн (ті нин сійӧс тӧданныд воддза гижӧдсьым) гортас пызан весьтас ӧшалӧ фото. Мися, коді тайӧ. Тайӧ пӧ менам сӧвесьтӧй... Аньлӧн быдтасъясыс, первоклашкаяс. Видзӧны пӧ менӧ компьютер сайын дыр пукалӧмысь. ))
  Менам талун тшӧтш эм татшӧм сяма "сӧвесьт". Со:


  Тайӧ Том филологъяслӧн гожся университетын проза да поэзия нырвизьын велӧдчысьяс. Анжелика Геннадьевна Елфимова туйдысьныс корис менӧ, гожся университетса выпускникӧс, сёрнитыштны енбиа нывкаяскӧд. Ме висьталышті аслам олӧм йылысь, Сёльыбса школа, искусствояс гимназия, Сыктывкарса университет, талунъя позянлунъяс йылысь. Сёрниті "Коми йӧзкостса радиоын", Том коми войтырлӧн "МИ" котырын зільӧм йылысь да... Дерт жӧ, блогысьӧм йылысь. Висьталі, мый гежӧда бӧръя кадас гижа блогӧ, но кӧсйыси талун быть мыйкӧ пасйыштны сэтчӧ. Медым меным мӧрччисджык, нывъясӧс фотографируйті.)))


   Ог тӧд, сетіс менам сёрниӧ нывъяслы мыйкӧ, эз... Творчество нырвизьын найӧ, гашкӧ, меысь сюсӧсьджык (зэв вежӧра "студентъяс") ))... Аслам олӧм вылӧ мыджсьӧмӧн ме висьталі некымын мӧвп, кодъяс отсалӧны меным.
1) "Неважно в каком крутом вузе ты учишься, важно суметь себя релизовать" (11-ӧд классын велӧдчигӧн тадзи меным висьталіс гимназияса радейтана велӧдысьясысь ӧти Алла Александровна Таскаева). И тадзи позьӧ шуны оз сӧмын велӧдчанін йылысь сёрнитігӧн.
Мукӧдторсӧ гӧгӧрвои ачым: 
2) Эн полӧй сьӧкыд уджысь, сійӧ тіянӧс унджыкторйӧ велӧдас.
3) Козьналіс кӧ тіянлы Енмыс ыджыд озырлун - чужӧмсяньныд тӧдны некымын кыв, некоднан йывсьыс эн вунӧдӧй. Тайӧ артмас, кыдзи шуасны тай, "зарыть талант в землю"...
4) Босьтӧй олӧмсьыс став мичасӧ да бурсӧ, мый сійӧ вӧзйӧ, эн коллялӧй кадсӧ весьшӧрӧ, быдлаӧ пырӧдчӧй!
5) Ми (комияс) ёна этшаӧнӧсьджык рочьяс либӧ, шуам, англичанаяс дорысь. Тшӧкыда овлӧ, мый ӧти морт серти донъялӧны сылӧн кывъя став йӧзсӧ. Та пона пыр колӧ зільны лоны медся бурӧн, вежӧраӧн, мичаӧн, шаньӧн...
И, дерт жӧ, 
6) Эскӧй бурӧ, эскӧй, мый кӧсйӧмъясныд збыльмасны, зільыштӧй, и ставыс артмас!  

А тайӧ фотоыс архивысь.)) 10 кымын во сайын тадзи велӧдчисны гожся университетса студентъяс.))

  Ыджыд аттьӧ проектсӧ котыртысьяслы! Аттьӧ, мый гожся университет казялӧ енбиа ныв-зонмӧс, туйдӧ-велӧдӧ найӧс, восьтӧ налы аслыспӧлӧс планета, кӧні вежӧрӧн, сёрниӧн, сьӧлӧмӧн веськӧдлӧ чужан кывйӧн гижны кӧсйӧм...


среда, 3 июня 2015 г.

ШАНЬ КОМИ СИКТЪЯС

   Пыр нимкодяся да шензя... Миян сэтшӧм ыджыд да озыр республиканым! Россияса мукӧд регионсӧ либӧ весиг суйӧрсайса мукӧд канмусӧ позьӧ некымын лунӧн кытшовтны. Буретш тадзи менам некымынысь нин артмыліс. Шуам, коркӧ 9 кымын лунӧн автобусӧн ветлім европаса 7 канмуӧ. Аддзылім Финляндия, Швеция, Франция, Германия, Дания, Голландия да дзик неуна - Бельгия.  Колян вося гожӧмнас 2 вежонӧн аддзылі Краснодар край да Кабардино-Балкарияса уна кар да мича ин. Коми мунымӧс тайӧ каднас он кытшовт! Со и атмӧ, кавшасьлі Эльбрус вылӧ, но эз аддзыв Урал... А Княжпогост, Вуктыл, Чилимдін, Воркута - тайӧ быттьӧ мӧд планетаяс...
   Мупытшса да пармаса озырлунъяс кындзи миян регионным ёна озыр мича сиктъясӧн да шань коми йӧзӧн.  Университет помалі 3 во сайын нин. Ӧні гӧгӧрвоа, кутшӧм бур, кор ӧти позйӧ овмӧдчӧны республика пасьталаысь ныв-зон. Ӧтуволанінын медводдза лунъяссяньыс быдӧн заводитӧ гӧгӧрвоны коми кывлысь озырлунсӧ. "Тшутшку", "джек", "ныы", "пони" да мукӧд кывъяс вежӧртӧм бӧрын висьтасян нин чужан грезддорса мича инъяс йылысь, кӧні кыдзи гӧтрасьӧны да гуасьӧны, мукӧдтор. Вылыс тшупӧда велӧдчанін помалӧм бӧрын разалім  коді кытчӧ. Талун менам студенталан чой-вокӧй олӧны Сыктывкарын, Удораын, Луздор, Сыктыв, Кулӧмдін районъясын, Вуктылын, Инта районын, Вежа Петыр карын. Ставӧн ми ёртасям, да эм кӧ позянлун, пыр зілям аддзысьлыны. 


   Студенталігӧн на ми ветлӧдлім ӧта-мӧд дорӧ гӧсти. Шуам, ме вӧлі Елюк дорын Зимстанын, Маринук дорын Усогорскын, ӧти Юлюк дорын Косланын, а мӧд дорын - Важгортын. Аслам гортӧ кыскылі сёрнисикасъяс туялан практика дырйи джын группанымӧс. А коді эз удит петкӧдлыны ассьыс сиктсӧ ёртыслы велӧдчигӧн, тайӧс позьӧ вӧчны талун.)) Ӧні миян семьыян кык Королева. Королева - "жена князяӧс" ті нин бура тӧданныд. Мӧд Королевакӧд ми эг сӧмын ӧтлаын велӧдчӧй, но и ӧтлаын уджалам. Тайӧ, дерт жӧ, ставлы тӧдса телекодзув Любовь Королева.)) Колян шойччан лунъясӧ Люба восьтіс меным республиканымлысь нӧшта ӧти, ой, весиг кык пельӧс!
   Ветлім Любалӧн Вера Михайловна мамыскӧд да поддельнӧйса школьникъяскӧд походӧ Дӧрӧшӧ (сэтшӧм нимкодь вӧлі, мый став челядьыс сёрнитӧны комиӧн!)


 


















Буглясим лыаын да нимкодясим вӧр-ваӧн Ларувын. 


Пажын кадӧ сёйим петшӧра чӧскыд шыд.
Трӧича водзын субӧтаӧ ветлім шойна вылӧ.
Бура мыссим пывсянын!
Видзӧдім фотоальбомъяс да "Холостяк" телешоу.))
Любаяслӧн мича керка бокын меститчысь качай вылын удитліс кольмыны юрӧй.)  
 



  Пӧддельнӧйын полім сывны шонді улын, а Шойнатыӧ кежавлігӧн полім гыма зэрысь. Полім... Но веськалім сы улӧ Эжваті мотора пыжӧн гуляйтӧм бӧрын.)) Кӧтасим, кӧмнымӧс няйтсьӧдім сёя муӧн, но сьӧлӧм вылын вӧлі долыд! Коми сиктъясӧ коркӧ ёна важӧн поздысьлӧма шаньлун. И буретш сыӧн тані ставыс лолалӧ!
   Аттьӧ шойччан лунъясысь Любуклы, Мишалы, Вера Михайловналы, Поддельнӧйса да Шойнатыса вӧр-валы да шань йӧзлы!

Но и ӧти ачпас:




воскресенье, 5 апреля 2015 г.

КЫКӦН

   "Зал для двоих" нима выставка видзӧдны корысь афишаяс важӧн нин ылӧдлӧны менсьым "завиднӧй" (кыдзи шуӧ мамӧй) синмӧс. 


  Шуим тӧрыт менам муса ёрт Армениумкӧд (збыль вылас Арменуи) ветлыны кытчӧкӧ озырмӧдыштны ловнымӧс. Видзӧдлі, кутшӧм спектакъяс лоӧны - ставсӧ нин аддзылі. Мися, вай выставка вылӧ ветлам! Вӧлӧмкӧ, бӧръя лун тайӧ экспозициясӧ петкӧдлӧны. Позьӧ шуны, чеччыштім Армениумкӧд мунысь поездӧ. ;)
   Инга Поповская да Саша Порошкина - сыктывкарса том серпасасьысьяс. Найӧ неважӧн памалӧмаӧсь Сыктывкарса Канму университетын искусствояс факультет. Ми нимкодясим нывъяслӧн фотоясӧн, живописьӧн да графикаӧн.Уджъясысь тыдалӧ, мый Инга да Саша ёна радейтӧны ёртъяссӧ, бипур бокын гитараӧн ворсӧм, выль инъяс, пемӧсъясӧс да ставнас олӧмсӧ.
   Неыджыд фотоотчёт: 




 Мый эськӧ кӧсйӧ кыйны бутыльнас зонмыс... Сашалӧн тайӧ фотоыс меным медъёна кажитчис.


Инга зіьӧ "ДРУГ" кӧзяинтӧм понъясӧс видзанінын.

Радейтана кружкалы сиӧм серпас! Збыль... Тадзи и эм! Мукӧдъясыс "сьӧлӧм берданыс" видзӧны найӧс...

 Колим нывъяслӧн "серпасасян" историяӧ ассьыным "ки туй"...


Интереснӧ, мый "Кыкӧнлы жырйӧ" ми ветлім кыкӧн жӧ. Выставкалӧн нимас быттьӧ аслыспӧлӧс индӧд, кодкӧд ветлыны сэтчӧ. ))


суббота, 4 апреля 2015 г.

КЫК ДА ДЖЫН КЕКӦНАЧ!!!

       Удораса Черныбын «Лицей при МИ» колис нин кык вежон сайын, а юрын да сьӧлӧмын пыр на кылӧ «кык да джын кекӧнач»… Мый тайӧ? Тайӧ "бурсьыс-бура" донъялӧм!  

Важӧн нин юӧртім, кыдзи ставыс колис. Ӧні окота юксьыштны лицейса серамбанаторъясӧн.  
  •  Черныбӧ мунігӧн сёрнитім сы йылысь, мый ёна кӧ мый йылыськӧ мӧвпавны, сійӧ быть лоӧ. Юлюк Королева висьталіс, мый неважӧн сійӧ «притянитӧма» вой кыа. Петім нин поездысь, мунам машинаӧн. Другысь нывъяс кыдз тай горӧдасны!!! Ӧшиньӧдыс кодкӧ аддзӧма вой кыа. Черныбын нин нимкодясьыштім миян кӧсйӧм серти артмӧм вӧр-ва мича петкӧдчӧмнас. 
  • Сійӧ жӧ войнас. Кор куйлан кык судтаа крӧватлӧн вылыс джаджъяс, мирсӧ аддзан выльногӧн. Узьны водігӧн орчча крӧватлӧн вылыс судтасянь кыла: 
– Кутшӧм мича тэнад пельыд!
Ме:
- Дааа? Первойысь кыла! Менам сійӧ аслыспӧлӧс!

- Да? А менам тшӧтш эм уродство!

  •       Медым стӧча тӧдны, кодӧс кыдзи шуӧны, корим бейджъясӧ быдӧнлы пасйыны ним да кыв, коді эськӧ тӧдчӧдіс налысь инсӧ тайӧ олӧмас. Артмис сідз, мый миян лои кык «катшасин». Ӧтиыс на пиысь  тавося «Райдаын» «Катшасин» ним босьтысь Маринук Роноева. Медым торйӧдны "дзоридзьяссӧ", Маринук лоис «официльнӧй катшасинӧн». 
 
  •    Тӧдмасигӧн быдӧнлы сетім кодзув, кӧні гижӧма сёрникузя заводитчӧм. Ӧти зонлы веськаліс «Ме пыдди пукта … уджсикас». Вова гора шуис:
- Ме пыдди пукта ТРАКТОРИСТ уджсикас!
Кык лун чӧжсӧ зонмӧс сідзи и шуим «Вова тракторист». Черныбын радейтӧны ставныссӧ нимтыны. Гашкӧ, кӧвъясис да енбиа, бур зонлы тайӧ нимыс.))


  • Мӧд кодзув вылын вӧлі гижӧма: «Менам радейтана козин…» Элла шуис: «Менам радейтана козин… лыжи, кодӧс меным кодкӧ козьналас!»  (Элла – лызьӧн ислалысь бур нывка, пырӧдчӧ быд сикас ордйысьӧмас).  

  •     Элла йылысь жӧ.

«МИшкаяслӧн» важ ёрт Надюк – Эллалӧн чой. Олӧны Черныбын. Мыссим чойяслӧн пывсянын, пырим керкаӧ. Телевизорӧд петкӧдлӧны биатлон. Элла син вештытӧг видзӧдӧ.

Юлюк Надюклы:

- Ой! Кутшӧм тэнад киыд, Надюк, менам кодь жӧ, рӧбӧтшӧй! Эллаыдлӧн со кутшӧм мича кузь чуньясыс.

Надя:

- Дерт! Юрас сӧмын лыжи да!

Элла кыліс сӧмын «лыжи» кыв:

- Кодлӧн?!

Надя недыр думыштлӧм бӧрын:

- А… Шипулиныслӧн!

Ми Юлюккӧд гигзям, а Элла:

- Шипулиныслӧн абу сӧмын лызьяс, но и лыйсьӧм!

  •  Удж заводитігӧн юалім том йӧзлысь, мый найӧ медъёна виччысьӧны «Лицей при МИсянь». Некымынӧн вочавидзисны:
- Ме виччыся… этнодискотека!

  •       Рытнас корим шуны, мый медъёна кажитчис. Саша нима зон:
- Мне очень понравилась сегодня… еда!
Со тадзи ми лицеясим! Унатор на вӧлі! Кекӧначасьысьяс, содтӧй, мый эг пасйы! ))


среда, 18 февраля 2015 г.

"ПАРАКОД" - МЕДСЬӦКЫД КЫВ...

  Талун ме гижи олӧмам медся класснӧй диктантсӧ! Ӧтувъя диктант вылас мунтӧдз полыштны нин заводиті. Ёнджыкасӧ эг сы понда, мый дзик нинӧм ог тӧд. Майшаси, мый, гашкӧ, унаӧн оз и локны.
   Пыри, а йӧзыс тыр нин! И локтӧны, бара локтӧны... Сэтшӧм нимкодь лоис! Любӧ (тадзи шуӧны миян Удораын) вӧлі важ ёртъясӧс да тӧдсаясӧс паныдавны, а нӧшта на нимкодь вӧлі аддзыны выль чужӧмъяс! Сё дас гӧгӧр морт пӧ Сыктывкарын диктантсӧ гижӧма.


   Владимир Васильевич Тиминӧн гижӧм текстыс, чайта, эз вӧв ёна сьӧкыд, но ме тӧда нин, мый торкалӧмъяс менам эмӧсь... )) Серавтӧдз миян лои "паракод" кыв гижигӧн. Ыджыд жырйыс ставнас шызьыліс. Кӧнкӧ шӧпкӧдӧны "пароход", кодкӧ "парокод"... Со, мися, коми йӧзыд коми диктантын роч кывъяссӧ гижны оз кужны... Истиннӧй комияс!!!
   Университетса группасьыным ми вӧлім куимӧн: кык Королева (Юлюк да Любук) да ме. Зэв нимкодь вӧлі важ томдырйи моз орччӧн пукалӧмӧн гижны чужан кывйӧн диктант.


Шмонитышті весиг, мися, локтан воӧ диктант бӧрын колӧ ӧтвылысь тшай юны. Ӧд тані ми паныдасям важ ёртъяскӧд, тӧдмасям выль йӧзкӧд, тані ми быттьӧ ӧти семья. )) И мед, оз кӧ ставлӧн ло "4" да "5", ӧтувъя диктант вылӧ колӧ ветлыны долыд рула!

среда, 4 февраля 2015 г.

«КУЛЬ УПАКИТӦ!»

   «Гын сапӧг» — удораса ногӧн «упаки» (миянын мичаа шуӧны «упАки»). Тӧвнас тайӧ менам медрадейтана кӧм. Сиктын кӧть карын кӧдзыд лунъясӧ менсьым пыр кынмысь кокӧс сӧмын сійӧ вермас дорйыны! Во 2 -3 сайын ньӧби аслым руд рӧмаӧс, мичмӧдышті еджыд лентаӧн, да сідзи и ветлӧдла удж вылӧ кӧть гӧсти.
   Выль во кежлӧ ветлі гортӧ, Сёльыбӧ. Мамӧ ассьыс упакисӧ сетіс. Войнас кӧ сӧмын пӧрччывлі а шоныд да небыд кӧмсӧ...
   Ӧшым тӧлысь 31-ӧд лун. Ывлаас 30 минуса гӧгӧр. Рытнас чукӧртчим мамӧкӧд петавны клубӧ видзӧдны концерт. Пасьтаси нин, петны дась, а мамӧй меным: «Женя, куль упакитӧ! Тадзи он жӧ пет! Сапӧгась!» Ме: «Ог! Мыйла? Сапӧгӧн кынма!» А мамӧ: «Клубӧ ли бур туйӧ упакиӧн миян оз ветлыны. Коркӧ удж вылӧ мӧдӧдчи садйӧ. Тшӧтш упакиаси. А воча меным сиктса ань. Шензьӧмӧн шуӧ, тэ пӧ кытчӧ татшӧмасӧ мӧдӧдчин? А ме: «Садйӧ...  А лым талун колӧ зыртны да!» Сійӧ: «А но, сідзкӧ»... 


    Кывзі ме висьтсӧ, сералышті. Мися, но и модникъяс миян Сёльыбын. Карын том ни пӧрысь оз яндысь упакиӧн ветлыны, а тані ставыс мӧдног. Эк кывзысь мамӧлысь, упакинам и петі сиктса клубӧ. Колӧ ӧд «шоныд» модасӧ кодлыкӧ заводитны!

Р.S: А важӧн ветлӧмаӧсь жӧ клубӧ упакиӧн. Кор сиктса школаын на велӧдчи, мамӧй меным сетіс фетрысь вӧчӧм еджыд упаки, тайӧн пӧ бабыд танцы вылӧ ветлӧдлӧма. ;)

четверг, 29 января 2015 г.

ЧӦСКЫД УНМА КОМИ КОЗИН

   Чужан лунӧй колян во помас нин вӧлі, а козинъяс тӧвшӧр тӧлысь быд на менӧ корсисны да нимкодьӧдісны... Со татшӧм менам тӧждысьысь рӧдвуж да ёртъяс! Ачым шензя.)) Ставлы ыджыд аттьӧ! Кӧть эськӧ и козиныс оз ков, тайӧ йӧзыс - менам олӧмын меддона козинъяс! 
    Со тайӧ козиныс суис менӧ Сёльыбын, кор тай ме выльвося шоччан лунъяс вылӧ ветлі гортӧ. Вайӧма сійӧс Разыбысь Маиса тьӧт, мамӧлӧн коймӧд кӧленаын чой. Тайӧ пӧ миян котырсянь! Видзӧда выль узьлан кӧлуй вылӧ, а сійӧ, вӧлӧмкӧ, коми - "Чӧскыд Ун" гижӧма. Ок и чӧскыд жӧ унъяс кута вӧтавны! Та кындзи на, Выль воӧн чолӧмалігӧн Надюк козьналіс лёк вӧтъяс куталантор. Ачыс вӧчӧма!)) 


Р.S.: А узя ме чӧскыда! Унджык кӧ эськӧ та вылӧ кадыс вӧлі на.