четверг, 11 сентября 2014 г.

ЫСТӦЙ МАМНЫДЛЫ ФОТО

Ті ыстыланныд мамъясныдлы ассьыныд фотояс? Онӧй кӧ, ёна вӧзъя! Неважӧн на и ме тшӧтш гортӧ мӧдӧдлі гожся серпасъяс.
Менам ныр улын пыр эм комьютер, чорыд дискыс потсьӧ нин быд сикас лӧпсьыс. Тані эм быдторйыс. Но век медся окота пыравны  «ФОТО» папкаӧ. Сійӧ ловзьӧдӧ колян кадсӧ, казьтылӧ олӧмысь шуда здукъяссӧ да вунлӧм нин чужӧмъяс. Ӧти киноын кодкӧ геройясысь шуис, мый колӧ фотографируйтны став шуда здуксӧ, мед сэсся эн жалитӧй сійӧ кадръяссьыс, кодъяс эз веськавны фотоаппарат объективӧ…  
Водзынсӧ цифровӧй «мыльницаӧс» пыр сьӧрысь новлӧдлі. Ӧні мамӧлы сійӧс сеті. Аслам ыджыд зеркалка, кодӧс аскӧдыд быд лун он босьт. А телефонӧй, кыдзи шуӧ Никита воча вокӧй, «деревяннӧй». Та понда быд здуксӧ ӧні фотографируйтны ог вермы, кӧть эськӧ неважӧн и усьліс шуд велӧдчыны «GEOMETRIA ФОТО АКАДЕМИЯЫН»

Ми, том йӧз, ӧні гежӧда печатайтам фотояс, миян ӧд ставыс син улын — техникаын. Ыстӧй кӧть пара, кӧть ӧти фото мам-батьныдлы. Налы ӧд пыр нимкодь листавны муса ныв-пиукныслӧн фотояса альбом, видзӧдны налӧн чужӧм вылас, вензьыны, код вылӧ кагаыс ёнджыка ветлӧ, ропкыштны ӧнія кадся модаа дженьыд платтьӧяс ли розя джинсыяс вылӧ, петкӧдлыны тайӧ серпасъяссӧ ёртъясныслы, рӧжвужлы либӧ уджъёртъяслы. Кӧть коми йӧзыд и оз ошкыны быдтасныссӧ ни оз ошйысьны асланыс челядьӧн, кӧнкӧ пыдын лов пытшкас налы пыр окота кодкӧдкӧ юксьыштны тіян вермӧмъяс йылысь радлунӧн.
Менам мамӧлӧн Женюклӧн фотояса эм уууна альбом, ичӧтдырсяньӧй ӧнія кадӧдз. Кӧсъянныд ко мекӧд бурджыка тӧдмасьны, корлӧй найӧс мамукӧйлысь.
Неважӧн гортӧ ветлігӧн, казялі, мый менам выль альбом гортын овмодчӧма. Мамӧ шуис, тайӧ пӧ тэнад. Видзӧдлі, а кышӧд вылас… ёж. Ме, шензьӧмон:
-  А мыйла менам альбом вылам ёжик?
- Сы вӧсна мый ёжик кодьӧн мукӧддырйиыс овлан, - нюмдыштӧмӧн шаня вочавидзис мамукӧй. :))


среда, 10 сентября 2014 г.

МУСА МОРТЛӦН СИН

Отпуск водзын тыри уджӧн, но кольны лыддьысьысьясӧс гижӧдтӧг ог вермы. Сідз нин регыд меысь шойччыны кутанныд.)) Со мый аддзи архивысь. Гижӧдыс нёль во сайся. Ог тӧд, мый подув вылын артмылӧма сійӧ, но талун мӧвпъясӧй збыль татшӧмӧсь жӧ...

         Вöян тайö тыас, но он кöсйы мездысьны. Тöвру шумöн кыпöдö гыяс, но он тэрмась, он весиг мöвпав кевмысьны. Тані тэныд лöсьыд, шоныд, небыд, и тэ он окотит татысь петны, кöть и вартчынытö татшöмлаын некор эн кужлы. Кыдзи веськалiн тайö джуджыд инас, ачыд он гöгöрво, он помнит… 
Муса мортлöн синмас пöртмасьö став мичаыс, сöстöмыс, меліыс, мый эм тайö паськыд му вылас… Тэ пöдан тайö мичас, но öд медшöрыс, медмусаыс, меддонаыс тайö мичас буретш тэ… Тэ понда и мукöдторйыс тайö мортыслы мусмö. Сöмын кор тэ видзöдчан сылöн синмас, синаканьыс ыдждылö саридзöдз. Но ваыс сэні, мыйлакö, ньöти абу сола, а кампет кодь юмов. Тані тэ рöмпöштанын моз тыдалан, но збыльвывсасьыс ёна мичаджык да бурджык.
Сöмын видзöдлан муса мортлöн синмас, и гöгöрвоан нин сылысь шогсö, долыдлунсö. Тані оз ковны кывъяс - видзöдлас вермас висьтавны унджык. Лöглун ли майшасьöм сэтысь аддзигöн, йирмöг босьтлас, кынтылас… Радлунöн кö видзöдласыс тыр, дзордзалысь льöм кöра мелі тöвруöн быттьö öвтыштлас…
Тэ сёысь, весиг сюрсысь сійöс тöдмалан, тайö синсö… Сьöлöмыд висьталас… Вежöрыд казьтыштас… 

вторник, 9 сентября 2014 г.

ФИНН-ЙӦГРА ФИЛОЛОГЪЯС ЙЫЛЫСЬ ГУСЯТОР

Да. Тайӧ гусятор… Гусятор коркӧ вӧлі, но ӧні нин, кад кольӧм мысьт, позьӧ кодлыкӧ и висьтавны. Гижӧдсӧ сиа дона ёртъяслы: Андрей Фёдоровичлы  да Ёмка Колялы. Чайта, оз кутны ме вылӧ ёна скӧравны висьталӧмӧй понда, а мекӧд тшӧтш нюмдыштасны кӧнкӧ ылі Инта районса Петруньын да Эст муын ли Удмуртияын…
Ветлӧдлі талун арся Сыктывкарті… Казьтылі студенталан кадся медшуда арнымӧс. Тайӧ вӧлі витӧд курс. Кӧч тӧлысь, а велӧдчыны оз ков. Асывсяньыс волі тӧвзя практикуйтчыны «Коми йӧзкостса радиоӧ»
А рытнас пыр радейтана ёртъяскӧд! Кор пусям-пӧжасям, кор сьылам, кор прӧста юксям лунтырся лоӧмторъясӧн, а кор и гуляйтам.
Ӧти рытӧ «Ордым» лавкаӧ пыралӧм бӧрын локта вӧлі студентъяслӧн ӧтуволанінӧ, сэкся гортам. Киам зэв сьӧкыд мешӧк. Сэні «Коми орфография кывкуд» да гӧрдов кирпич – "Русско-коми словарь". Небӧгъяссӧ корис ньӧбны да ыстыны менам сиктысь том велӧдысь Людмила Васильевна Селиванова. Сійӧ сетӧ ныв-зонлы коми кывйысь тӧдӧмлунъяс Удора районын Черныбса школаын. 

И сідз. Муна гортлань. Триньӧбтӧны зонъяс. Ми пӧ Колялӧн ӧтуволанінас (ми сэк торъя керкаясын олім), тэ пӧ кӧні, общагаӧ кӧсъям ветлыны. Мися, но петӧй, ме тіянсянь матын нин.
Паныдасим, сувтодісны менӧ шӧрӧ, мырддисны небӧга мешӧкӧс, пырыс тыдалана зонтикӧс, кодӧс ме пыр нимта «детскӧйӧн», босьтісны менӧ кыкнан боксянь ки полӧд. Мунам и пыр мыйкӧ бызгам-больгам-варовитам… Другысь зонъяс кутісны дурны. Ӧтиыс ёртсӧ йӧткалӧ зонтӧн, а мӧдыс тойлысьӧ пакетӧн. Эн кӧть думыштӧй, мый найӧ тышкасисны. Эз, дерт. Татшӧм ышмалӧмыс налӧн вӧлі. И друг… Эндрю, кыдз ми сійӧс шуим томдырйи, кутіс лэбзьӧдны пакетсӧ Колилань, а мешӧкыд кыыыдз тааай потас… А шнич выль кывкудъясыд мичаа шняпкысисны веськыда ва гӧптӧ… Пырысь-пыр заводитім мездан операция. Перйим небӧгъяссӧ. Одйӧ котӧртім гортӧ. Листбокъяссӧ кутім чышкавны, пӧлявны, косьтыны… Но «тӧварнӧй видӧдз» вайӧдны небӧгяссӧ эг и вермӧй. Орфография кывкудйыс татшӧмыс аслам выль вӧлі. Шуи сетны сійӧс сиктса велӧдысьлы, а ачым босьті неуна няйтсьӧмсӧ. Мӧд кывкудйыслӧн кӧзяиннас лоис талун велӧдысь нин жӧ Андрей. Эз и мӧвпав, мый сылы тайӧ небогыс колӧ, а кывкудйыд ачыс сійӧс аддзис. Удораӧ ыстӧм вылӧ ньӧбим бара на выль «кирпич».
Чайта, тшӧкыда Эндрю казьтылӧ тайӧ серамбана-шогалан лоӧмторсӧ (500 шайтыд студентыдлы ого-го кутшӧм на сьӧм) кузь тӧвся рытъясӧ урокъяс кежлӧ дасьтысигӧн… Менам со пызан вылын куйлӧ жӧ орфография кывкудйӧй. Тӧрыт на джадж вылысь перйи – блогӧс ӧд тӧлкӧн колӧ зільны гижны да… 

понедельник, 8 сентября 2014 г.

ТРУДНОСТИ ПЕРЕВОДА ПӦ...

       Тӧда, мый йылысь ті ӧні думыштінныд. Женяыс тай дзикӧдз роч вылӧ вуджӧма нин. Эг, ёртъяс. Эн майшасьӧй. Темасӧ рочӧн нимті, сы вӧсна мый роч йӧзкӧд сёрнитігӧн, тайӧ серамбанаторъясыс талун артмисны.))
        Асывнас МTSBonusъяс йылысь ёртӧйкӧд телепон пыр бызгим. Сійӧ меным гӧгӧрвоӧдӧ, мед пӧ видзӧдлыны, кымын тэнад бонус, «надо отправить английскую «i» на номер 4555», гӧгӧрвоин пӧ. Ме сылы шуа: «Вот ме ысті точка и-сӧ номер вылас, а бӧрынджык меным бонус лыднас СМС воас?» А сійӧ: «Нет. Не точку и и, надо латинскую «i» отправлять!» )) Вот тадзи ме талун абу коми ёртӧс велӧді коми шыпасӧ. Ӧні кутас тӧдны, кыдзи коми нывлы колӧ гӧгӧрвоӧдны тарифъяс да бонусъяслысь аслыспӧлӧслунсӧ. ;)

   Луннас нин кори миян уджалан жырйӧ, сідз шусяна, системнӧй администраторӧс, либӧ компьютершикӧс, морт ногон кӧ. Ӧти здукӧн лӧсьӧдіс да петкӧдліс, кыдзи колӧ выль ногӧн пырны уджвывса электропоштаӧ. Сэсся нин юалі, мыйла, мися, кор ме кӧсъя вӧчны уджтас йылысь анонс «В Контактеын» «Коми йӧзкостса радио» котырын да пуктыны сэтчӧ фотояс, менам компьютер вылысь тайӧ некор оз артмы, и пыр ковмӧ Машаӧс уджсьыс торкны. Компьютер тӧдысьным тшӧктіс пырны социальнӧй везъяс аслам лист бокӧ. Ачым муні помавны радиоуджтасӧс мӧд пызан сайӧ, а сійӧ дыр зунньысис менам уджалан «машинаын»… Матыстчи, мися, мыйкӧ артмӧ али оз. А сійӧ: «Ог нинӧм гогӧрво татысь тэнсьыд. Комиӧн ставыс». А меным сэтшӧм любӧ лои! Любӧ, мый, кӧть и абу ставнас миян инерфейсыс «В Контактеыслӧн» вуджӧдӧма, но сійӧ мый вӧчӧма, вӧчӧма колана ногӧн, коми ногӧн! Нюмдышті Денислы, шуи, оз кӧ нинӧм артмы, мед нин, тайӧ удобствотӧгыс нин ола. Но зіль мортыд векжӧ разис мытшӧдсӧ. Молодеч!


P.S.: Колӧ вуджӧдыштны кӧть талун некымын кывтэчас интерфейсас. Кодкӧ зіль йӧзсьыс тай вуджӧдчӧ-а. Коді, ог тӧд. Сизим да джын сюрс коми вылас колӧ на пӧ бергӧдны…



воскресенье, 7 сентября 2014 г.

МЕДСЯ ЧӦСКЫД ЯЙ

Менам эмӧсь тӧдсаяс, кодъяс дзикӧдз оз сёйны яй. Но мый сэсся… Налӧн ловныслы кӧ тадзи кокниджык, мед. Быдӧн бӧрйӧ ачыс. Да ӧд? Ме серти, яй быть колӧ сёйны! Ог кут гӧгӧрвоӧдны – дыр лоӧ, да и ті ставсӧ асьныд бура тӧданныд.
Кӧсъя висьтавны, кыдзи ме тӧдмалі, кутшӧм яй меным медся чӧскыд. Тавоӧдз чайті, мый став яйыс ӧткодя чӧскыд, сӧмын неуна торъялыштӧ кӧрнас да чорыд-небыдлуннас.
Гожӧм заводитчигас, ми ёртъяскӧд ветлім шашлыкасьны. Босьтім Сёльыбысь вайӧм меж яй да «Экономысь» ньӧбӧм порсь яй. Вӧр-ваын ставыс ӧтмоза лӧсьыд, кыдз Удораын шуӧны, кажитчис. Сӧмын баля яйсӧ гӧтшкыны-няклявны сьӧкыдджык вӧлі. Гортын нин кольӧм яйторъяссӧ сёйыштігӧн, гӧгӧрвои, мый порсь яйлӧн мӧд сикас яй дорас весиг некутшӧм кӧр абу, турун кодь, кыдзи шуӧ ёртӧй.
Мӧдтор! Вежон сайын ёна кӧсъя вӧлі яя шыд. Став уджӧс бокӧ коли, пуи мӧс лыяс. Зэв сыла шыдыс артмис, а кӧрыс ни дукыс абу сэтшӧм, мый виччыси. Кӧть мый татчӧ шу! 
Колодильник сывтігкежлӧ дасьтігмоз, кыкысь кымын вежоннас куті пусьыны. А ӧти шуда лунӧ пуигас нин куті исавны чӧскыд, дыр виччысяна, чужан гортӧс казьтылана кӧр… Мый тайӧ вӧлі? Меж яй! Мыйла буретш тайӧ яйыс ӧні, верстяммигӧн, меным кутіс чайтсьыны медчӧскыдон? Сы понда мый ме сы вылын быдми. Ми водзынсӧ пыр видзим балюкъясӧс, сэсся нин коркӧ кӧзаясӧс комыліс жӧ кутны. А ӧні некод гортса пемӧсъясысь миян абу – гидным важмис. Шыдам пусис медбӧръя межным... Коді сэсся и кутас татшӧм яйнас чӧсмӧдлыны… Тотара сайӧ ковмас верӧс сайӧ петны. ;)
Вот тадзи! Ме серти, яй колӧ сёйны. И колӧ сёйны сэтшӧмӧс, код вылын быдмин! Ӧд буретш татшӧмыс медуна пӧльза вайӧ, сетӧ олӧм вын да и медся на чӧскыд!

Р.S: Ммм… Гижигкості, кынӧмӧй сюммис… Тіян, тыдалӧ, тшӧтш. Шыд сёйны некодӧс ог кор. Фотоыс абу аслам, а ӧтуввезйысь. Колодильникӧй со сылӧ надзӧникӧн.

суббота, 6 сентября 2014 г.

КОКНИ-Ӧ ГАРДЕРОБШИКАВНЫ?

Шуӧны, мый медся ропкысь йӧзыс – тайӧ вахтёръяс, джодж мыськысьяс да гардеробшикъяс. Ёртъяс, оз ков подуласьны стереотипъяс вылӧ, олӧмас абу пыр тадзи! Но мукӧддырйи, збыльысь, чайтсьӧ, мый тайӧ удж сикасъясас зільысьясыс асьныссӧ царъясӧн лыддьӧны, и весиг тэнад олӧмыд быттьӧ на киын… Ті менӧ гӧгӧрвоаныд, вӧвлінныд кӧ коркӧ ӧтуволанінын ӧбитайтысь студентӧн. Идрасьысь кӧ секцияад, ныртӧ сэтчӧ эн сюй! Мыссьыны ни асмогасьны оз позь тайӧ кадас! Терпит, кыдзи верман! А петкодчан кӧ, «шань» кывъясӧн пельтӧ кодсюрӧяс вермасны шонтыны. Вахтёръяскӧд абу жӧ кокни… «Чой» ли «вокӧс» мед жыръяд пыртлыны, колӧ думыштны дзонь операция! Гардеробшикъяс? А мый гардеробшикъяс? Пыс кӧ пальто вылад абу, эн и сувт чередӧ паськӧмтӧ сдайтны…
А кокни-ӧ эськӧ гардеробшикавны? Ме эг на видлы ачымӧс тайӧ уджас, но чайта, мый кӧнкӧ сьӧкыд, а конкӧ и абу ёна… Ёртъясӧй коркӧ уджавлісны карса клублӧн пӧрччысянінын. Вот сэні ме кодь рам морты эськӧ вӧлі ёна сьӧкыд. Код нарӧдкӧд ӧти кывтӧ аддзыны абу кокни. А студентъяс дорад, чайта, шогсьыны оз ков. Найӧ томӧсь, на вылӧ и ропкыштны позьӧ на. Но ӧд велӧдчанінын оз сӧмын том йӧз пасьнысӧ кольны…
Тӧрыт ветлі Сыктывкарса ӧти техникумӧ. Петігам матыстчи пӧрччысянінӧ виж плашӧла (гашкӧ, аддзылиныд ме вылысь), нюжӧді номерокӧс. Гардеробшицаыс босьтіс да шуӧ, мыйла пӧ сэтшӧм водз мунан. Ме вочавидзи, мый тэрмася удж вылӧ, волі корреспондентавны. А сійӧ меным: «А мыйла эн висьталӧй? Ме эськӧ торйӧн ӧшӧді». Ме, шензьӧмӧн: «Мыйла?» А сійӧ: «Гӧсьтъяс миян пыр шуӧны, менсьым пальтоӧс пӧ студентъяслӧнкӧд  орччӧн эн ӧшӧдӧй - куритчанӧн кутас паркйыны!» Мися: «Нинӧм. Уджӧдзӧй воӧдчигкості, дукыс вошас!» А аньыс меным: «Мӧдысь висьталӧй. Миян ӧд студентъяслӧн торйӧн, сёянінын зільысьяслӧн мӧдлаын, велӧдысьяслӧн бара на торъя пельӧс, кыдзи и гӧсьтъяслӧн, а министерствоысь кӧ локтӧны, налысь колӧ вешалка вылӧ!» 
Вот тадзи! Быдлаын колӧ лад. А лад лӧсьӧдӧм могысь быть  зільны.
Кымын йӧз мирас… И ставным сэтшӧма торъялам! А коді ми, тӧдтӧм морт вермас висьтавны оз сӧмын миян паськӧм, удждон да транспорт серти, но и сы серти, кӧні ӧшалӧ миян паськӧмным...

Мда… Йирым тӧлысь 9-ӧд да 10-ӧд лунъясӧ Коми Республикаса вужвойтырлӧн шылада-драмаа театрын кутасны петкӧдлыны Н.Гогольлӧн «Ревизор» комедия серти «Петербургысь инкогнито» спектакль. Колӧ ветлыны! ;)


Р.S: Театрса гардеробын шань жӧ уджалысьясыс. И комиӧн сёрнитӧны. А таысь ёна нимкодь!
Со, татшӧм пасъяс налӧн эмӧсь! Том коми войтырлӧн «МИ» котыр козьналіс.))

пятница, 5 сентября 2014 г.

ТУСЬ

           Со и ме нин коми кывъя блога! Нимті сійӧс дженьыда – «ТУСЬ». Мыйла? Та вылӧ зэв уна помка.



 Ӧти-кӧ, менам чужанінын, Комиын Удора районса Сёльыб грездын, тадзи нимтӧны медмуса да меддона йӧзӧс. Да-да! Унаысь и ме дорӧ шыасьлісны «тусь нылӧ», ӧні корсюрӧ шулӧны жӧ тадзисӧ. ;)
Гортын ме, дерт, эг ӧти «тусьӧн» вӧв, «тусьясӧн» вӧліны и каньпи, и пон, и кӧзукъяс...  Збыль! Коркӧ арнас ли, тулыснас ли, ӧти кывйӧн кӧ, сэк, кор оз на/нин быдтыны градвыв пуктасъяс, ми лэдзим горт дор йӧрӧ ставныс вылӧ ӧти Серунь нима кӧзаяснымӧс. Мамӧ матыстчис код дорӧкӧ на пиысь да шань гӧлӧсӧн шуис: «Тусь нылӧ тэ менам!» «Тусь» кывсӧ кыліс Биша понным да кӧзуксьыс ӧдйӧджык мамӧ дорӧ котӧртіс, сюйис нырсӧ ки улас - малав-сывъяв пӧ менӧ. Кӧть эськӧ сійӧ дзик абу «тусь ныв», а «тусь пи»!
Та серти нӧшта ӧти серамбанатор эм. Босьтім коркӧ суседъяслысь ичӧт каньпиӧс аслыным. Сійӧ гожӧмнас миян суседка да рӧдвуж Нина баб дорын шойччис Калугаысь Ира внучкаыс, меным сійӧ нёльӧд кӧленаын чой. Пукаліс миянын, ворсӧдчис-ворсӧдчис ловъя небыд ёкмыльнас да сэсся и нӧжӧдіс мамӧлы «Тётя Люба, возьмите своего туш пиа!» кывъясӧн.))
А! Нӧшта ӧтитор! Лелькуйтан «тусь» кывлӧн эмӧсь, сідз шусяна, производнӧйяс! Унаысь кывлі, мый мусмӧм мортӧс либӧ радейтана мукӧдтор шуӧны «тусюк». И весиг роч кывйӧ тайӧ мелі кывсӧ пыртӧны. Мича зонъяс йылысь миян грездса нывъяс сьылӧны: «Ой! Он такой туська!» Серам петӧ.)))
Кыдзи тшӧкыда овлӧ филологъясӧн, дыр куті сёрнитны, вешйышті шӧр могысь. Дерт, вешъян… Луннас морт юрын шутлялӧ 100 000 гогӧр мӧвп. А ме на нӧшта и ныв! Вот! А сідз, ме сӧмын ичӧтик тусь тайӧ ыджыд мирас…
         Нӧшта мыйла «тусь»? Сы вӧсна мый тусьысь пыр чужӧ мыйкӧ чӧскыдтор, пӧльза вайысь тор, сьӧлӧмкылӧм… Шобді тусьысь артмӧ вын сетысь нянь (коми йӧзлӧн эм весиг татшӧм шусьӧг: ӧти тусь – чепӧль пызь, быдса шеп – пӧшти кӧвдум),  ӧмидз тусьысь – менам радейтана варенньӧ, зэр тусьысь – мусӧ сӧстӧммӧдысь зэр… Дерт, гашкӧ, менам тусьӧй оз вермы дзоньнас мирсӧ юмзьӧдны, но… ме стӧча тӧда, мый талунъя тусьӧс лыддиг-ӧктіг-сёйигӧн, ті быть нюмдыштінныд.)) Эн соссьӧй весиг! Со тай, бара нин чужӧм выланыд нюмтор кыйкнитліс! 


P.S: Да! И мед эськӧ менам тусь вылӧ некодлӧн оз ло аллергия! Тьпу-тьпу-тьпу, мед ог вомдзав!

Зэр...

Кор ме волывла Печать керкаӧ, пыр зэрӧ...